Pika kufitare e Morinës ka regjistruar një fluks të shtuar lëvizjesh gjatë natës së fundit, teksa pushues nga Kosova dhe vendet e rajonit janë drejtuar drejt bregdetit shqiptar. Sipas të dhënave zyrtare, në harkun kohor nga ora 20:00 e mbrëmjes deri në orën 08:00 të mëngjesit, kanë hyrë në territorin shqiptar gjithsej 14 113 persona.
Krahas fluksit të udhëtarëve, është vënë re edhe një numër i lartë i mjeteve të transportit, ku spikasin 119 autobusë që kanë kaluar kufirin në të njëjtën periudhë. Ndërkohë, lëvizjet në drejtim të kundërt, përkatësisht daljet nga Shqipëria, kanë qenë dukshëm më të pakta, me vetëm 1 887 shtetas të regjistruar.
Sipas informacioneve nga terreni, pavarësisht ngarkesës, qarkullimi në pikën kufitare nuk është ndërprerë dhe nuk janë krijuar radhë. Procedurat për përpunimin e dokumentacionit kanë vijuar normalisht, duke përfituar nga marrëveshja për lëvizjen e lehtësuar ndërmjet Shqipërisë dhe Kosovës. Pushuesit thonë se zgjedhin bregdetin shqiptar për çmimet e përballueshme, pastërtinë e plazheve dhe afërsinë gjeografike me Kosovën.