Kombëtarja e Kosovës në futboll humbi me rezultat 1-0 ndaj Turqisë në ndeshjen e luajtur më 31 mars 2026 në stadiumin Fadil Vokrri në Prishtinë. Kjo humbje parandaloi kualifikimin e Kosovës në Botërorin 2026, ndërsa Turqia sigurroi biletën për turneun botëror.
Pas ndeshjes, përzgjedhësi Franco Foda u shpreh i mërzitur për rezultatin, por theksoi se ekipi kishte dhënë maksimumin. "Sot jemi të gjithë të mërzitur. U munduam dhe deshëm që të kualifikoheshim në Botëror. Ishte e mundur ndaj Turqisë për 90 minuta dhe jam krenar me ekipin", deklaroi ai.
Foda vlerësoi paraqitjen e lojtarëve dhe tha se ata e kishin përfaqësuar Kosovën në mënyrën më të mirë të mundshme. Ai premtoi vazhdimësi dhe falënderoi tifozët për mbështetjen e tyre të vazhdueshme, si në stadium ashtu edhe në ndeshjet jashtë vendit. "Dua ta shfrytëzoj rastin t’i falënderoj të gjithë tifozët që ishin në stadium dhe vizituan shtetet tjera kur ishim mysafir. Më e rëndësishmja është që populli i Kosovës ta ndiejë se në fushë është një ekip që jep shpirtin", shtoi ai.
Sa i përket të ardhmes së tij, Foda konfirmoi se nuk ka plane largimi. "Nuk e kam në plan ta lë Kosovën, sepse më pëlqen vendi dhe populli", tha ai. Tekniku gjerman shpjegoi se kishte ardhur te Kosova me synim kualifikimin në Kampionatin Evropian, dhe se zhvillimi i skuadrës kishte qenë më i shpejtë se sa pritej. "Qëllimi mbetet Evropiani", përfundoi ai.