Forca e Sigurisë së Kosovës merr pjesë në edicionin e 22-të të Konferencës Ndërkombëtare të Liderëve të Lartë të Nënoficerëve Senior (ICC 2026), që po zhvillohet në Shkollën e NATO-s në Oberammergau të Gjermanisë. Delegacioni i FSK-së përfaqësohet nga Rreshteri Major OR9, Ilir Rama, i cili po zhvillon takime me përfaqësues të lartë ushtarakë nga shtetet anëtare të NATO-s dhe vendet partnere.
Konferenca është organizuar nga Komanda Aleate e NATO-s për Transformim (ACT) dhe mbledh liderë të lartë të nënoficerëve nga struktura komanduese e NATO-s, Byroja e Gardës Kombëtare të ShBA-së, si dhe përfaqësues nga institucione të ndryshme arsimore ushtarake. Qëllimi kryesor i këtij forumi është shkëmbimi i përvojave mbi mjedisin aktual gjeopolitik dhe sfidat e sigurisë që prekin operacionet e NATO-s dhe të vendeve partnere.
Gjatë punimeve, Rreshteri Major Rama ka prezantuar vizionin e Komandës së FSK-së për zhvillimin profesional të nënoficerëve, duke e cilësuar këtë proces si shtyllë kryesore për forcimin e kapaciteteve operacionale dhe modernizimin e forcës. Diskutimet gjithashtu janë përqendruar te mësimet e nxjerra nga operacionet ndërkombëtare dhe koordinimi për avancimin e stabilitetit dhe sigurisë globale.