Autoritetet shqiptare po zhvillojnë operacione intensive për shuarjen e vatrave të zjarrit në zonën e Pojanit në Fier dhe në Gjirin e Lalëzit në Durrës, pas vatrave të konstatuara gjatë mbrëmjes së djeshme. Ministri i Mbrojtjes, Ermal Nufi, njoftoi se rreth 100 efektivë të Forcave të Armatosura janë angazhuar në këto ndërhyrje për mbrojtjen e banorëve dhe pronave.
Në zonën e Gjirit të Lalëzit, pranë Shën Pjetrit, operacioni përfshin 68 efektivë të ushtrisë dhe 15 automjete zjarrfikëse nga bashkitë Durrës, Shijak, Tiranë, Kamëz, Vorë, Kavajë dhe Elbasan. Për shkak të terrenit të vështirë kodrinor, pas punës së pandërprerë gjatë natës, në operacion është përfshirë edhe një helikopter, i cili po vijon ndërhyrjen nga ajri për izolimin e flakëve.
Ndërkohë, në Pojan, pranë Parkut Arkeologjik të Apolonisë, situata raportohet të jetë aktualisht nën kontroll. Efektivët e Forcave të Armatosura vijojnë monitorimin në terren, ndërsa gjatë ditës së djeshme në këtë zonë u angazhua edhe një helikopter i Forcës Ajrore. Autoritetet konfirmojnë se nga zjarret nuk ka pasur dëme në monumentet e zonës së Apolonisë.