Në Prishtinë u zhvillua Forumi i Biznesit Britanik, një ngjarje që shënon përpjekje të reja për forcimin e marrëdhënieve ekonomike ndërmjet Kosovës dhe Mbretërisë së Bashkuar. Kryeministri Albin Kurti vlerësoi se ndërsa partneriteti në fushën e sigurisë dhe mbrojtjes ka qenë historikisht i qëndrueshëm, tani është koha që bashkëpunimi të përqendrohet te mundësitë konkrete ekonomike.
Kryeministri Kurti e vuri theksin te rëndësia e bizneseve në krijimin e vendeve të reja të punës dhe qarkullimit të ideve përtej kufijve. Ai kujtoi lidhjet historike, duke iu referuar vitit 1999 dhe rolit të komandantit të atëhershëm të KFOR-it, gjeneralit britanik Michael Jackson.
Nga ana tjetër, ambasadori i Mbretërisë së Bashkuar në Kosovë, Jonathan Hargreaves, uroi Kosovën për zgjedhjen e presidentes së re, duke e cilësuar këtë si një pikënisje për një epokë të re zhvillimi. Sipas tij, marrëdhëniet midis dy vendeve duhet të evoluojnë përtej kujtimeve historike, duke u orientuar drejt prosperitetit të përbashkët dhe integrimit në institucionet euroatlantike.
Ambasadori theksoi rolin e diasporës kosovare në Mbretërinë e Bashkuar, të cilën e përshkroi si urë lidhëse për investimet dhe tregjet globale. Ai vuri në dukje se shumë pjesëtarë të diasporës kanë kontribuar ndër vite në fusha të ndryshme, duke u shndërruar në sipërmarrës, inxhinierë, akademikë dhe profesionistë që po ndihmojnë lidhjen e Kosovës me ekonominë globale.