Autoritetet policore në Mitrovicë kanë nisur hetimet lidhur me vdekjen e një foshnjeje, e cila u gjet pa shenja jete mëngjesin e datës 28 gusht 2026. Rasti është raportuar zyrtarisht rreth orës 08:00, pasi babai i foshnjës kishte vërejtur se fëmija nuk kishte shenja jete.
Në vendin e ngjarjes kanë mbërritur ekipet mjekësore, të cilat kanë konstatuar vdekjen e foshnjës. Në përputhje me udhëzimet e prokurorit të çështjes, trupi i pajetë i foshnjës është dërguar në Institutin e Mjekësisë Ligjore (IML) për kryerjen e autopsisë. Organet e rendit po vijojnë veprimet hetimore për të ndriçuar rrethanat e plota të kësaj ngjarjeje, ndërsa rasti është regjistruar zyrtarisht si hetim mbi vdekjen.