Federata Shqiptare e Futbollit (FSHF) po vijon procesin e përmirësimit të infrastrukturës sportive në mbarë vendin, si pjesë e angazhimeve për organizimin e ndeshjeve finale të Kampionatit Evropian U-21.
Një ndër ndërhyrjet kryesore po kryhet në kompleksin Shtëpia e Futbollit, ku dy fushat me bar natyral i janë nënshtruar një procesi të plotë rehabilitimi. Pas heqjes së tapetit ekzistues, në ditët në vijim pritet të nisë procesi i mbjelljes së barit të ri.
Ky investim synon të rrisë cilësinë e terreneve stërvitore dhe të garantojë kushte optimale për ekipet kombëtare, si dhe për aktivitetet e tjera futbollistike në vend. Institucioni bën të ditur se punimet po zhvillohen sipas afateve të planifikuara dhe fushat do të jenë të gatshme për përdorim brenda mesit të muajit shtator.