Kanë nisur punimet në stadiumin Air Albania, pjesë e një projekti të rëndësishëm infrastrukturor në kuadër të përgatitjeve për finalet e Kampionatit Europian U-21 2027. Shqipëria është një ndër dy vendet organizatore të këtij kompeticioni prestigjioz.
Ndërhyrja në impiantin kombëtar fokusohet në përmirësimin e bazamentit të fushës dhe instalimin e një tapeti të ri me bar hibrid. Kjo ndërhyrje bëhet për të përmbushur standardet më të larta të kërkuara nga UEFA për zhvillimin e ndeshjeve ndërkombëtare.
Sipas FSHF-së, ky investim është pjesë e angazhimit të vazhdueshëm për modernizimin e infrastrukturës sportive në vend, me qëllim garantimin e kushteve optimale për ekipet pjesëmarrëse dhe një eksperiencë më të mirë për tifozët. Mikpritja e këtij Europiani vlerësohet si një moment historik për futbollin shqiptar dhe një mundësi për promovimin e vendit në arenën ndërkombëtare. Punimet pritet të përfundojnë sipas planit, në mënyrë që stadiumi të jetë plotësisht i gatshëm për ndeshjet e kompeticionit.