Përfaqësuesit e UEFA-s kanë përfunduar vizitën e radhës në Shqipëri në kuadër të përgatitjeve për finalet e Kampionatit Europian U-21 2027, turne të cilin vendi ynë e bashkëorganizon. Gjatë këtij inspektimi katërditor, delegacioni vlerësoi standardet teknike dhe operacionale të impianteve të përzgjedhura.
Ekspertët u përqendruan te infrastrukturat kritike, si sistemet e ndriçimit, gjeneratorët rezervë dhe masat e sigurisë. Vizita përfshiu inspektimin e katër stadiumeve:
• Loro Boriçi (Shkodër)
• Elbasan Arena (Elbasan)
• Air Albania (Tiranë)
• Arena e Demave (Tiranë)
Në Tiranë, delegacioni u njoh me ecurinë e punimeve në stadiumin Air Albania, ku po përmirësohet bazamenti i fushës dhe po instalohet një tapet me bar hibrid. Në Arena e Demave, po punohet për zëvendësimin e tapetit artificial me bar natyral, proces që përfshin instalimin e sistemit të ri të vaditjes dhe ndërtimin e një terreni loje në përputhje me kriteret e UEFA-s.
Ky proces është pjesë e bashkëpunimit mes Federatës Shqiptare të Futbollit (FSHF) dhe institucionit ndërkombëtar, me synimin për të përmbushur të gjitha detyrimet infrastrukturore që kërkon organizimi i këtij kompeticioni prestigjioz për futbollistët e rinj.