Një delegacion i UEFA-s ka mbërritur në Shqipëri për vizitë zyrtare inspektuese në kuadër të përgatitjeve për finalet e Kampionit Europian U-21 2027, ku Shqipëria do të jetë mikpritëse.
Vizita nisi në stadiumin Loro Boriçi në Shkodër, ku përfaqësuesit e UEFA-s, së bashku me stafin e Federatës Shqiptare të Futbollit (FSHF), zhvilluan një inspektim të detajuar të ambienteve.
Delegacioni përbëhet nga rreth 20 ekspertë dhe zyrtarë, të cilët u ndanë në grupe pune për të verifikuar komponentët organizativë dhe infrastrukturorë. Gjatë katër ditëve të vizitës do të inspektohen edhe stadiumet Elbasan Arena, Air Albania dhe Arena e Demave, të përzgjedhura për ndeshjet e kampionatit.
Deklarata e përgjegjëses së projektit
Evia Kumria, përgjegjëse e projektit Euro U-21 2027 në FSHF, deklaroi se kjo është vizita e dytë në kuadër të këtij kampionati. "Këtë herë delegacioni ka qenë më i zgjeruar, me përfaqësues nga UEFA dhe FSHF. Kemi qenë rreth 20 persona, të ndarë në tre grupe të ndryshme, që kanë inspektuar pjesë të ndryshme të stadiumit Loro Boriçi. Kemi identifikuar nevojat që duhet të plotësohen deri në organizimin e kampionatit në vitin 2027. Në përgjithësi, vizita ka qenë shumë e suksesshme", tha ajo.
Ky inspektim përbën një fazë të rëndësishme në përgatitjet e FSHF-së, duke konfirmuar angazhimin për të përmbushur standardet e UEFA-s për turneun.