Ish-sulmuesi italian Igor Protti ka ndërruar jetë në moshën 58-vjeçare në Livorno, pas një beteje të gjatë me sëmundjen. Lajmi u bë i ditur nga familja e tij përmes një mesazhi prekës në rrjetet sociale, ku vetë ish-futbollisti e përshkruante jetën e tij si një "ndeshje që ka arritur në fishkëllimën e fundit".
Në karrierën e tij si lojtar, Protti la gjurmë të thella në futbollin italian. Ai njihet si i vetmi lojtar që është shpallur golashënuesi më i mirë në Serie A (me Barin), si dhe në Serie B dhe Serie C (me Livornon). Gjatë rrugëtimit të tij sportiv, ai veshi fanellat e disa klubeve të rëndësishme si Bari, Livorno, Lazio dhe Napoli, duke u kthyer në një simbol të dashur për tifozët. Pas tërheqjes nga fusha, ai vazhdoi karrierën si menaxher sportiv.
Sipas njoftimit zyrtar, homazhet për të ndjerin do të mbahen sot, në orën 15:00, në sallën e funeraleve Frongillo në Cecina. Kryebashkiaku i Livornos, Luca Salvetti, njoftoi se të shtunën në orën 18:00, trupi i Prottit do të dërgohet në stadiumin Armando Picchi, vendi ku ai shkroi histori me fanellën e Livornos. Autoritetet lokale pritet të shpallin një ditë zie në nderim të figurës së tij.