Futbollisti 22-vjeçar, Mohammed Fuseini, është bërë viktimë e një grabitjeje të dhunshme në mëngjesin e së dielës në Bruksel. Pamjet e siguruara nga mediat belge tregojnë pesë persona të maskuar duke e nxjerrë me forcë lojtarin nga automjeti i tij në lagjen Dansaert. Ndërsa tre prej tyre e mbanin lojtarin, dy të tjerë kontrollonin mjetin për sende me vlerë.
Sipas raportimeve, grabitësit arritën t'i merrnin futbollistit një orë dore të markës Rolex Datejust, vlera e së cilës përllogaritet ndërmjet 8,000 dhe 14,000 euro, si dhe telefonin e tij celular. Autoritetet policore të kryeqytetit belg kanë konfirmuar se kanë nisur një hetim të plotë për identifikimin dhe arrestimin e autorëve pas denoncimit të bërë nga pala e dëmtuar.
Klubi i tij, Union Saint-Gilloise, njoftoi se lojtari nuk ka pësuar dëmtime trupore, megjithatë mbetet i tronditur nga ngjarja. Zyrtarët e klubit kanë siguruar se po i ofrojnë futbollistit ganez mbështetjen e nevojshme psikologjike dhe profesionale.
Karriera e futbollistit
Mohammed Fuseini u transferua te Union Saint-Gilloise në fillim të vitit 2024 nga skuadra austriake Sturm Graz, për një vlerë prej 2 milionë euro. Që nga ajo kohë, ai ka shënuar 14 gola dhe ka dhënë 3 asistime në 71 paraqitje për ekipin belg. Kontrata e tij aktuale është e vlefshme deri në verën e vitit 2028, me opsion për një vit shtesë, ndërsa vlera e tij në tregun e transferimeve vlerësohet rreth 2.5 milionë euro.
Përditësime
Policia belge ka arrestuar dy nga pesë të dyshuarit për grabitjen e dhunshme të futbollistit Mohammed Fuseini, 24 vjeç, në Bruksel. Pas incidentit, lojtari u dërgua në spital për kontrolle mjekësore dhe tashmë i është bashkuar stërvitjeve me ekipin e Union Saint-Gilloise. Autoritetet konfirmuan se grabitësit i kanë marrë një orë Rolex Datejust dhe dy telefona iPhone.