Galatasaray synon Bruno Fernandesin me ofertë milionëshe

Klubi turk Galatasaray synon të sigurojë shërbimet e mesfushorit portugez Bruno Fernandes, duke vlerësuar mundësinë e një transferimi nga Manchester United. Sipas raportimeve, oferta e përgatitur nga kampionët e Turqisë kap vlerën e 50 milionë eurove, ku 40 milionë euro do të ishin të garantuara, ndërsa pjesa tjetër do të plotësohej përmes bonuseve. Për lojtarin, klubi turk ka parashikuar një pagë vjetore prej 21 milionë eurosh për një periudhë katërvjeçare. Kjo shumë do të ishte pothuajse e gjitha në dispozicion të lojtarit, pasi klubet në Turqi zakonisht mbulojnë detyrimet tatimore, ndryshe nga sistemi në Angli.

Nga ana tjetër, Manchester United ka bërë të ditur se nuk ka ndërmend të heqë dorë nga kapiteni i skuadrës. Sipas BBC Sport, klubi anglez nuk planifikon shitjen e Fernandesit dhe nuk ekziston një shumë që do ta bindte stafin drejtues për një largim të mundshëm. Pavarësisht faktit se kontrata e mesfushorit skadon pas një viti dhe ende nuk është arritur një marrëveshje për rinovim, nuk ka indikacione që lojtari dëshiron të largohet nga Old Trafford. Përkundrazi, ai synon të vazhdojë kontributin e tij te skuadra angleze, pas një sezoni ku regjistroi 21 asistime dhe krijoi 136 raste për gol në Ligën Premier.

Përveç Galatasarayt, në media është raportuar për interesim edhe nga klube të tjera evropiane si Juventus, AC Milan dhe Atletico Madrid. Megjithatë, oferta e klubit turk mbetet ndër më të përfolurat për shkak të shifrave financiare. Bruno Fernandes, i cili do të mbushë 32 vjeç në shtator, mbetet një element kyç për projektin sportiv të trajnerit të Manchester United.