Manchester United ka rikonfirmuar vendosmërinë për të mbajtur në skuadër kapitenin dhe mesfushorin kryesor Bruno Fernandes, pavarësisht interesimit të madh nga jashtë klubit.
Gjatë tre viteve të fundit, disa klube të Saudi Pro League kanë tentuar ta bindin portugezin për një transferim në Lindjen e Mesme, por pa sukses. Sipas burimeve pranë klubit anglez, një faktor kryesor që mund ta mbajë lojtarin në Old Trafford është rikthimi në garat e Ligës së Kampionëve.
Brenda klubit ekziston bindja se kualifikimi në Champions League do të jetë element vendimtar për ta bindur Fernandes të vazhdojë projektin te Djajtë e Kuq, duke qenë se ai mbetet një nga figurat kryesore të skuadrës.
Raportimet theksojnë se portugezi ka një marrëdhënie të shkëlqyer me ish-lojtarin e klubit Michael Carrick, i cili ka ndikuar pozitivisht në ambientin e tij brenda klubit gjatë viteve të kaluara.
Manchester United e konsideron Fernandes një pjesë kyçe të projektit afatgjatë dhe nuk ka plane për ta lënë të largohet, pavarësisht ofertave të mundshme në verë nga Arabia Saudite apo klube të tjera të interesuara.