Gazeta spanjolle “El Correo” i ka kushtuar një artikull situatës së protestave në Shqipëri, të cilat kanë hyrë në ditën e 58-të. Sipas raportimit, qytetarët kërkojnë dorëheqjen e kryeministrit Edi Rama dhe shpalljen e zgjedhjeve të parakohshme, duke kundërshtuar projektet e investimeve turistike të familjes së Donald Trump, të cilat operojnë përmes fondit Affinity Partners të Jared Kushner.
Sipas artikullit, qeveria shqiptare i ka dhënë statusin e investitorit special kësaj firme për dy projekte madhore:
• Një resort në ishullin e Sazanit, me kosto rreth 1.4 miliardë euro.
• Një projekt në zonën e mbrojtur të Vjosë-Nartës, me një vlerë të përllogaritur prej 4 miliardë eurosh, në bashkëpunim me investitorët nga Katari, Ramez dhe Mohamad al-Khayyat.
Lëvizja qytetare, e njohur si “revolucioni i flamingove” për shkak të shqetësimeve mbi biodiversitetin në ligatinat e Vjosë-Nartës, ka denoncuar ndryshimet ligjore në zonat e mbrojtura që kanë lehtësuar këto plane. Prokuroria Antikorrupsion e Shqipërisë ka nisur hetimet lidhur me mënyrën e transferimit të titujve të pronësisë në këto zona.
Kryeministri Edi Rama, aktualisht në mandatin e tij të katërt, ka refuzuar kërkesat për tërheqje nga projektet. Ai i ka cilësuar këto investime si një mundësi për të katapultuar turizmin në vend, duke argumentuar se numri i udhëtarëve ka arritur në 12 milionë në vitin 2025, krahasuar me 3 milionë në vitin 2013. Lidhur me protestat, 62-vjeçari ka akuzuar aktivistë të huaj kibernetikë dhe, konkretisht, Iranin, si nxitës të manifestimeve.
Artikulli vë në dukje gjithashtu se qeveria shqiptare ka mbajtur një qëndrim sfidues edhe ndaj Bashkimit Evropian, i cili ka shprehur shqetësim për pasojat mjedisore të këtyre ndërtimeve dhe ndikimin e tyre të mundshëm në procesin e anëtarësimit të Shqipërisë në bllokun evropian.