Revista italiane AD Italia ka risjellë në vëmendje investimin e Ivanka Trump dhe bashkëshortit të saj, Jared Kushner, në ishullin Sazan të Shqipërisë. Në artikullin e saj, revista e konsideron këtë investim të jashtëzakonshëm, por shton se "jo gjithçka që shkëlqen është ar". Vendasit e quajnë tashmë ishullin "Ishulli i Trumpëve".
Çifti ka marrë miratimin përfundimtar nga kryeministri Edi Rama, i cili më 30 dhjetor miratoi planin e kompanisë Atlantic Incubation Partners LLC. Projekti parashikon një investim prej 1.4 miliardë dollarësh, në përputhje me ligjin shqiptar për investimet strategjike. Ai bie në sektorin prioritar të turizmit dhe përmbush kërkesat për krijimin e rreth 1.000 vendeve të punës, sipas Reuters.
Pjesëmarrja e shtetit shqiptar do të realizohet përmes krijimit të një entiteti të përbashkët ligjor, në të cilin do të përfshihet Korporata Shqiptare e Investimeve ose Albanian Investment Corporation. Projekti synon transformimin e ishullit, ish-bazë ushtarake e braktisur, në një resort luksi.
Ideja daton nga viti 2024. Në qershor 2025, çifti mori miratimin paraprak nga qeveria shqiptare, sipas New York Times. Ky miratim erdhi pak pas fitores së Donald Trump në zgjedhjet presidenciale të Shteteve të Bashkuara, çka shkaktoi polemika. Një përfaqësues i kryeministrit Edi Rama u shpreh për New York Times se interesi i një sipërmarrësi amerikan kaq të njohur për Shqipërinë bën krenar vendin.
Investimi vazhdon të komentohet në mediat e huaja, duke nxjerrë në pah interesin për zhvillimin turistik në Shqipëri.