Gazetari gjerman Martens kritikon Osmanin për premierën e dokumentarit Melania

Gazetari gjerman Michael Martens i gazetës Frankfurter Allgemeine Zeitung (FAZ) ka kritikuar presidenten e Kosovës Vjosa Osmani për premierën e dokumentarit "Melania" nën kujdesin e Presidencës së Kosovës.

Osmani njoftoi se premiera u mbajt në Cineplexx dhe e cilësoi ngjarjen si lidhje mes ekranit kosovar dhe atij botëror, duke paraqitur një perspektivë unike mbi familjen presidenciale amerikane.

Në një postim, Martens shkroi se ekziston një vijë ndarëse mes përfaqësimit të interesave shtetërore dhe asaj që ai e quajti "prostitucion intelektual vetë-poshtërues" ose "vetë-poshtërim intelektual". Ai e akuzoi Osmanin për sjellje skandaloze dhe veprim për interesa personale politike.

Martens pretendoi se citonte një gazetar kosovar, i cili sipas tij kishte shkruar se Osmani vepron në mënyrë të papranueshme dhe tenton të ushtrojë presion ndaj Kuvendit.

Këtyre deklaratave u reaguan ashpër nga Rinor Nuhiu, këshilltari i presidentes Osmani. Në platformën X, Nuhiu shkroi: "Të quash një kryetare shteti që kujdeset për interesat kombëtare të vendit të saj një 'prostitutë vetë-degraduese' është e turpshme dhe e neveritshme. Kjo tregon gjithçka për ty dhe për mendësinë tuaj të kalbur dhe vulgare. Kjo është e sëmurë. Duhet të kesh turp nga vetja."

Nuhiu theksoi se pajtimi me një gjuhë të tillë tregon mungesë serioze të busullës morale dhe profesionale.

Gjithashtu, analisti boshnjak Jasmin Mujanoviq reagoi duke thënë: "Gjuha juaj është e turpshme."

Përplasja vazhdoi kur Martens iu përgjigj Nuhiut me tone ironike, duke e ftuar për një diskutim publik në Berlin mbi "sjelljen e turpshme dhe antievropiane" të presidentes Osmani.

Ngjarja ka nxitur debat në rrjetet sociale, ku disa e shohin patronazhin si veprim diplomatik të panevojshëm me ngarkesë politike, ndërsa të tjerë e mbrojnë si aktivitet kulturor ndërkombëtar.