Presidenca e Republikës së Kosovës reagoi më 9 mars 2026 ndaj thirrjeve publike për "pushkatim" të presidentes Vjosa Osmani. Në një njoftim zyrtar në Facebook, Presidenca e dënoi ashpër këtë gjuhë si rrezikshme, që nxit urrejtje dhe normalizon dhunën politike.
Sipas reagimit, përdorimi i fjalës "pushkatim" në debat politik nuk ka të bëjë me kritikë apo opinion, por me nxitje për dhunë. “Kosova nuk është dhe nuk duhet të jetë kurrë vend ku aktivistë politikë vetëshpallen gjykatës dhe shpallin dënime me jetë për figura të zgjedhura nga qytetarët”, thuhet në njoftim. Mentaliteti i tillë ka mbajtur peng debatin publik me etiketime, shpifje dhe linçime për dekada.
Presidenca thekson se presidentja Osmani nuk është "vegël" e askujt dhe as pjesë e fantazive konspirative për tradhti. Ajo është Presidente e Republikës së Kosovës, e zgjedhur ligjërisht dhe ushtron mandatin sipas Kushtetutës. “Ata që sot flasin për ‘tradhti’ dhe ‘pushkatim’ dhe shtyjnë përpara shpifjet e konspiracionet, në fakt janë duke bërë thirrje për dhunë e vrasje politike”, vijon reagimi.
Kosova ka paguar shumë për lirinë e saj që të tolerojë gjuhë linçuese ndaj institucioneve. Thirrjet për "pushkatim" nuk janë retorikë politike, por nxitje e drejtpërdrejtë për dhunë dhe krim. Kushdo që synon ta frikësojë presidenten me shpifje apo kërcënime, dëshmon se nuk e pranon ende republikën demokratike.
Presidenca u bën thirrje organeve kompetente të rendit dhe drejtësisë të merren urgjentisht me këto raste dhe t’i trajtojnë sipas ligjit. Reagimi vjen pas postimit të aktivistit Halil Geci në Facebook, ku shkruante “Po të ishte në Turqi, do të pushkatohej”.
Përditësime
Prokuroria Speciale ka inisuar rast penal për kërcënimet ndaj presidentes Vjosa Osmani, nën akuzën e veprës 'Dhuna ndaj përfaqësuesve të lartë të Republikës së Kosovës'.
Drejtoria për Hetimin e Krimit të Organizuar dhe Krimeve të Rënda në PK ka marrë autorizim për hetim.
Kërcënimet vijnë pas dekretit të Osmanit për shpërndarjen e Kuvendit.
Halil/Fadil Geci, babai i deputetit Fatos Geci të Vetëvendosjes, është i lidhur me rastin.