Shefi i zyrës për Evropën Lindore dhe Qendrore në gazetën prestigjioze The New York Times, Andrew Higgins, zhvilloi një vizitë në Vlorë, ku u njoh nga afër me zonën e Sazanit dhe të Zvërnecit. Vizita e tij në Shqipëri vjen në një periudhë interesimi ndërkombëtar lidhur me projektet e parashikuara në këto zona, të cilat kanë sjellë edhe protesta publike.
Gjatë qëndrimit, Higgins u shoqërua nga kryetari i Shoqatës së Operatorëve Turistikë të Jugut, Vasil Bedinaj, i cili e njohu me potencialin turistik të rajonit. Në prononcimet e tij, gazetari amerikan vlerësoi ndryshimet e ndodhura në vend gjatë tre dekadave të fundit dhe e cilësoi Shqipërinë si një destinacion konkurrues dhe më të përballueshëm ekonomikisht krahasuar me vendet e tjera të rajonit, si Kroacia apo Greqia.
Në lidhje me investimin e diskutuar që lidhet me kompaninë e Jared Kushner, dhëndrit të presidentit amerikan Donald Trump, Higgins mbajti një qëndrim të kujdesshëm. Ai deklaroi se nuk është kundër zhvillimit në parim, por vuri theksin te rëndësia e menaxhimit të investimit. "Nuk jam kundër tij në parim, por nuk është puna ime të kundërshtoj investimet", u shpreh ai, duke nënvizuar se bukuria natyrore e Zvërnecit duhet të ruhet përmes administrimit të duhur.
Gazetari vuri gjithashtu në dukje hendekun mes pasqyrimit në rrjetet sociale dhe realitetit. Ai hodhi poshtë pretendimet se Shqipëria ndodhet në një gjendje "lufte civile", duke e cilësuar situatën në terren si të qetë. Sa i përket ndikimit të politikës amerikane, Higgins sqaroi se nuk bëhet fjalë për politikë zyrtare të administratës, por për qytetarë amerikanë me interesa specifike politike që e shohin Shqipërinë si hapësirë për të shprehur ato interesa.