Lojërat Mesdhetare “Prishtina 2030” konsiderohen një nga ngjarjet sportive më të mëdha që pritet të organizohen në Kosovë. Përveç aspektit sportiv, ato ofrojnë mundësi për zhvillim ekonomik, përmirësim të infrastrukturës dhe rritje të vizibilitetit ndërkombëtar. Në një intervistë për KosovaPress, gazetari italian Fabio Donfrancesco vlerëson se kjo ngjarje shërben si moment i rëndësishëm për promovimin e Kosovës në Evropë dhe më gjerë.
Sipas Donfrancesco, për një vend të vogël si Kosova, që zhvillohet me shpejtësi në sektorët ekonomik dhe turistik, organizimi i këtyre lojërave përbën një shans të madh për rritje ekonomike dhe tërheqje turistësh ndërkombëtarë. Ai thekson se Kosova është vend i bukur, që mund të tërheqë vizitorë nga Italia dhe vende të tjera evropiane. "Për një vend të vogël, por në zhvillim të shpejtë rreth sektorëve ekonomikë dhe turistikë si Kosova, Lojërat Mesdhetare 2030 do të jenë një mundësi e rëndësishme, një mundësi shumë e madhe, e rëndësishme për zhvillimin ekonomik dhe natyrisht edhe turizmit", deklaron ai.
Donfrancesco shton se ngjarja do ta bëjë Kosovën më të njohur në arenën ndërkombëtare dhe do ta vendosë në qendër të vëmendjes evropiane e mesdhetare.
Gazetari ndalet te sfidat administrative dhe burokratike të organizimit të ngjarjeve të mëdha sportive. Duke u mbështetur në përvojën e Italisë, ai shpreh shpresën që Kosova të ketë procese më të thjeshta. "Në Itali ne kemi shumë probleme rreth burokracisë. Shpresoj që vendi juaj të jetë më i lehtë, por sidoqoftë, duke lënë mënjanë këtë, kjo është një mundësi për të zhvilluar vendin tuaj", thotë ai.
Përditësime
Fabio Donfrancesco, gazetar italian, vlerësoi përfitimet ekonomike nga Lojërat Mesdhetare Prishtina 2030. Ai tha: «Unë e di që vendi juaj është shumë i bukur, jo vetëm për italianët, por edhe për vendet e tjera evropiane dhe turistët – një mundësi e mirë për ta njohur. Kështu, këto do të jenë momente të mira, jo vetëm sportive, por edhe ekonomike.»