Në orët e paradites së sotme, në zonën e Pyllit të Sodës në qytetin e Vlorës, janë konstatuar katër granata dore dhe dy armë automatike. Zbulimi i tyre ka ndodhur pranë kanalit të hidrovorit, në një aks rrugor mjaft të frekuentuar që lidh qytetin me Zvërnecin.
Sipas dëshmisë së qytetares Elizabeta Shehaj, e cila raportoi gjetjen, pajisjet ishin të mbuluara dhe kishin dalë në pjesën anësore të rrugës. Menjëherë pas njoftimit, forcat e Policisë së Vlorës kanë mbërritur në vendngjarje dhe kanë rrethuar perimetrin e sigurisë për të izoluar zonën.
Nga verifikimet e para, rezulton se armët dhe granatat ishin të mbështjella dhe në gjendje të ndryshkur, duke mos paraqitur rrezik të menjëhershëm për banorët apo kalimtarët. Autoritetet dyshojnë se këto mjete luftarake mund të jenë hedhur ose groposur prej shumë vitesh, duke u lidhur paraprakisht me periudhën e trazirave të vitit 1997.
Në vendngjarje pritet mbërritja e specialistëve të xhenios për të bërë largimin dhe asgjësimin e kontrolluar të tyre. Ndërkohë, policia vijon punën për sqarimin e plotë të rrethanave të këtij rasti.