Një automjet tip fuoristradë, i cili rezultonte i vjedhur prej kohësh në fshatin Panaja, është gjetur i shkrumbuar gjatë orëve të vona të së hënës në një tunel të vjetër ushtarak në zonën e Cërkovinës, Vlorë. Prania e automjetit në këtë zonë të izoluar, larg rrugëve të asfaltuara, nuk ishte konstatuar më herët nga banorët e zonës.
Pas marrjes së njoftimit rreth orës 23:00, shërbimet zjarrfikëse kanë ndërhyrë për të shuar flakët, të cilat për shkak të djegies së mjetit kishin përfshirë edhe një pjesë të bimësisë përreth tunelit. Në vendngjarje kanë mbërritur forcat e Policisë dhe grupi hetimor, të cilët pas verifikimit të numrit të shasisë konfirmuan se mjeti ishte denoncuar i vjedhur.
Autoritetet kanë nisur punën për zbardhjen e rrethanave të ngjarjes. Pista kryesore e hetimit lidhet me përdorimin e mundshëm të automjetit në veprimtari të paligjshme, përpara se autorët ta braktisnin dhe t'i vinin zjarrin në tunelin e pashfrytëzuar. Për këtë qëllim, grupi hetimor po administron pamjet nga kamerat e sigurisë të zonës për të identifikuar personat që kanë transportuar mjetin dhe për të zbardhur itinerarin e ndjekur prej tyre.