Agjenti i modeleve Daniel Siad, 69 vjeç, është gjetur i vdekur të hënën në banesën e tij në Colombes, një periferi në veriperëndim të Parisit. Prokuroria e Nanterres ka konfirmuar hapjen e një hetimi për të zbardhur shkaqet e vdekjes, ndërsa është urdhëruar kryerja e autopsisë.
Siad ishte subjekt i hetimeve penale në Francë lidhur me bashkëpunimin e dyshuar me të dënuarin për abuzime seksuale, Jeffrey Epstein. Hetimet franceze kishin në fokus akuzat për trafikim qeniesh njerëzore, rekrutim të grave, si dhe vepra financiare, përfshirë pastrimin e parave dhe mashtrimin tatimor. Përveç këtyre, ai përballej me akuza për përdhunim dhe sulm seksual, pretendime të cilat i kishte mohuar vazhdimisht.
Dokumentet e deklasifikuara nga Departamenti Amerikan i Drejtësisë tregojnë se emri i Siad shfaqet më shumë se 2 mijë herë në dosjet e çështjes. Sipas provave, ai kishte pranuar pagesa prej dhjetëra mijëra dollarësh nga Epstein dhe në këmbim e kishte informuar atë për modele të reja, duke i dërguar fotografi dhe të dhëna për kandidate potenciale. Në një intervistë për CNN, Siad kishte deklaruar se nuk kishte pasur dijeni për rrezikun që përfaqësonte Epstein dhe se e kishte besuar atë si profesionist.
Ky rast shënon një tjetër zhvillim lidhur me rrjetin e Epstein, i cili vdiq në burg në vitin 2019, ndërsa një tjetër agjent francez, Jean-Luc Brunel, u gjet i vdekur në burg në vitin 2022.