Një ngjarje e rëndë është regjistruar në qytetin e Gjilanit, ku një 38-vjeçar është gjetur i pajetë në banesën e tij. Zëdhënësi i Policisë së Kosovës për rajonin e Gjilanit, Valon Osmani, konfirmoi se njoftimi është pranuar më 23 korrik 2026, në orën 18:26.
Pas marrjes së informacionit, në vendin e ngjarjes kanë dalë njësitet përkatëse policore, ekipi emergjent dhe Prokurori i Shtetit. Mjeku kujdestar ka konstatuar vdekjen e viktimës në vendin e ngjarjes. Sipas deklaratës zyrtare të policisë, bazuar në hetimet e deritanishme, nuk ka dyshime për ekzistencën e elementeve të veprës penale të vrasjes.
Me urdhër të prokurorit, trupi i pajetë i shtetasit të lindur në vitin 1988 është dërguar në Institutin e Mjekësisë Ligjore në Prishtinë për kryerjen e obduksionit. Hetuesit e Njësisë së Hetimeve Rajonale në Gjilan, në bashkëpunim me Prokurorinë e Shtetit, po vijojnë punën për sqarimin e plotë të rrethanave në të cilat ka ndodhur ngjarja.
Përditësime
Policia e Kosovës saktësoi moshën e viktimës së gjetur në Gjilan. Viktima është 34-vjeçar, i lindur në vitin 1992, duke korrigjuar informacionin e dhënë më herët se bëhej fjalë për një 38-vjeçar të lindur më 1988.