Një ngjarje e rëndë ka ndodhur pasditen e së hënës në fshatin Dobërçan të komunës së Gjilanit, ku një person ka humbur jetën si pasojë e rënies në një pus. Viktima, i lindur në vitin 1951, ishte duke kryer punime për pastrimin e objektit kur ndodhi incidenti.
Zëdhënësi rajonal i Policisë së Kosovës për rajonin e Gjilanit, Ismet Hashani, ka konfirmuar se njoftimi është pranuar rreth orës 14:23. Menjëherë pas thirrjes, njësitet patrulluese kanë dalë në vendin e ngjarjes për të hetuar rrethanat e incidentit.
Në operacionin e nxjerrjes së trupit janë angazhuar edhe njësitë e zjarrfikësve, të cilët realizuan zbrazjen e ujit nga pusi për të mundësuar ndërhyrjen. Pas nxjerrjes së viktimës, mjeku kujdestar ka konstatuar vdekjen e tij në vendin e ngjarjes.
Në vendin e ngjarjes kanë dalë gjithashtu hetuesit rajonalë dhe njësitë e forenzikës për të mbledhur dëshmitë e nevojshme. Me urdhër të prokurorit të shtetit, trupi i pajetë është dërguar në Institutin e Mjekësisë Ligjore për kryerjen e obduksionit, ndërkohë që policia vazhdon hetimet për zbardhjen e plotë të rastit.