Gjenerali Dedë Prenga, i ftuar në emisionin "Off the Record" të moderuar nga Andrea Danglli në A2CNN, vlerësoi se situata me Iranin është komplekse dhe askush nuk përjashtohet nga rreziku.
Ai theksoi se Shqipëria ka treguar pozicionin e saj ndaj Iranit përmes ngjarjeve si mbërritja e muxhahedinëve në Durrës, sulmit kibernetik dhe shkëputjes së marrëdhënieve diplomatike. "Ne jemi në pozita të tilla, përsa kohë nuk i kemi vendosur reciprokisht marrëdhëniet diplomatike", u shpreh gjenerali.
Prenga sqaroi se vendi nuk rrezikohet në masë të paimagjinueshme, por nuk përjashtohet nga lufta hibride. "Nuk them se rrezikohemi nga një raketë balistike e Iranit, që do të kalonte nëpër vende të NATO-s të përgatitura për ta interceptuar. Por nuk jemi të përjashtuar nga një veprim i një personi që askush nuk e komandon", tha ai.
Gjenerali përmendi mundësinë e qytetarëve të infiltruar mes muxhahedinëve për mbledhje informacionesh ose të personave të paguar nga jashtë për të lëshuar drone mbi objekte. "Nuk kemi në asnjë vend atë lloj sigurie, sepse do të kërkonte dy ushtarë ose policë për çdo qytetar në kontroll 24 orë", nënvizoi Prenga.
Ai vlerësoi se "zjarri i marrë mbi kurriz" ndikon, por parashikimet janë hipotetike. Shqipëria nuk rrezikohet në masë të konsiderueshme, por nuk përjashtohet si pjesë e koalicionit, duke kontribuar me kapacitete, përfshirë një rezolutë të miratuar sot.