Ministri i Punëve të Jashtme, Ferit Hoxha, raportoi në Komisionin për Punët e Jashtme për sulmin kibernetik të Iranit ndaj Kuvendit. Sipas tij, kjo ngjarë tregon se regjimi iranian do të përdorë çdo mjet kundër Shqipërisë.
Hoxha kujtoi sulmet e mëparshme të Iranit ndaj Shqipërisë në vitin 2022. Që atëherë, vendi ka përmirësuar aftësitë dhe sigurinë teknologjike, por theksoi se nuk ekziston siguri 100%. "Fakti që arritën të cenojnë infrastrukturën teknologjike të Kuvendit do të thotë që duhet të jemi shumë të vëmendshëm. Duhet të jemi alert", u shpreh ai.
Çështja është ngritur në NATO në diskutime të mbyllura. Ministri nuk dha detaje për arsye sigurie, por u shpreh i bindur se Shqipëria nuk është e vetme. "Kemi partnerët e tjerë të NATO-s me vete dhe ndihemi të sigurt", tha Hoxha, duke e lidhur çështjen me rritjen e gatishmërisë së mbrojtjes për aleancën.
Shqipëria mbështet politikën e sigurisë kolektive dhe pozicionohet krah SHBA-së për ndalimin e programit bërthamor dhe të raketave balistike të Iranit. Në vendet pararojë, bashkë me SHBA-në, ka kërkuar qartë ndërprerjen e këtyre programeve. Hoxha përmendi ndjeshmërinë e veçantë ndaj protestave në Iran pas vrasjes së një vajze, e cila u bë simbol i qëndresës qytetare për mosveshjen e shamisë. Ai e lidhi këtë me mbrojtjen e të drejtave bazike, duke bërë lidhje me Shqipërinë.