Ish-shefi i Shtabit të Përgjithshëm të ushtrisë ruse, Yuri Baluyevsky, i cili ka shërbyer edhe si zëvendësministër i mbrojtjes, kritikoi Vladimir Putinin për dështimet në luftën kundër Ukrainës.
Në një fjalim para Dhomës Publike të Rusisë, ai deklaroi se ka ardhur koha që presidenti rus të "fillojë të luftojë realisht".
Baluyevsky kujtoi se Rusia ishte e para që zhvilloi armë hipersonike.
Ai ironizoi se pavarësisht mburrjeve të përsëritura se këto armë janë unike dhe të pakonkurrueshme, ato nuk kanë rritur sigurinë e vendit.
Gjenerali akuzoi Putinin për mungesë reagimi ndaj sulmeve konkrete ukrainase, si ai me dron ndaj një ndërtese në Kremlin në vitin 2023 dhe sulmet ndaj aeroplanëve rusë të paralajmërimit të hershëm (AWACS).
Ai pyeti se sa vijë të kuqe mund të kalohen dhe kur do të vijë përgjigjja e duhur.
Sipas Baluyevskyt, mungesa e reagimit dhe strategjia aktuale mund të çojnë në pasoja serioze, duke lënë të kuptohet se ekzistenca e Rusisë është e rrezikuar nëse situata vazhdon kështu.