Në Prishtinë po mbahet për tre ditë konferenca e investitorëve amerikanë, e cila shihet si mundësi për të tërhequr investime të huaja direkte dhe për të përshpejtuar zhvillimin e infrastrukturës në kryeqytet.
Këto investime lidhen veçanërisht me organizimin e Lojërave Mesdhetare 2030.
Para të pranishmëve, përmes një videoje, foli gjenerali Wesley Clark, i cili shprehu krenarinë për popullin e Kosovës.
"Jam shumë krenar për popullin e Kosovës. Ju keni përballuar shumë gjatë viteve 1980 dhe 1990. Ju e keni fituar lirinë dhe shtetësinë tuaj", tha ai.
Clark theksoi rëndësinë e investimeve të huaja direkte si burim jetik për zhvillimin e vendit, duke krahasuar me përvojën e Shteteve të Bashkuara në shekullin e 19-të, ku investimet franceze, britanike dhe gjermane ndihmuan në zhvillimin industrial.
Ai përmendi potencialin e Kosovës:
- Burime të jashtëzakonshme të linjitit me cilësi të ulët, por shumë të vlefshme, që aktualisht digjen;
- Një komunitet të mrekullueshëm bujqësor;
- Ekologji të shkëlqyer;
- Male dhe qendra skijimi;
- Nevojë për reziliencë në infrastrukturë, si energji elektrike, ujësjellës komunal dhe furnizime energjetike.
Gjenerali Clark pati një mesazh të veçantë për qeverinë: "Qeveria ka një rol të madh për të luajtur, së pari në krijimin e një ambienti të mirë këtu, duke mirëpritur investitorët, duke ofruar mbështetje qeveritare dhe duke bërë partneritete publiko-private. Të gjitha këto duhet të jenë në tryezë."
Ai shprehu shpresën për mbështetje të fortë nga komuniteti ndërkombëtar për investimet në Kosovë.