Autoritetet doganore gjermane në portin e Wilhelmshaven, në Detin e Veriut, kanë finalizuar një operacion të gjerë kundër trafikut ndërkombëtar të lëndëve narkotike, duke sekuestruar më shumë se 8 tonë kokainë. Sasia e drogës ishte fshehur në një kontejner që vinte nga Afrika Perëndimore, i cili sipas dokumentacionit zyrtar transportonte kokrra kakaoje dhe kishte si destinacion përfundimtar Spanjën.
Sasia e lëndës narkotike, e vlerësuar në tregun e zi me vlerën e 500 milionë eurove, u zbulua më 9 shkurt, por njoftimi për mediat u mbajt sekret për arsye taktike hetimore, sipas Prokurorisë së Aurichut dhe Drejtorisë së Përgjithshme të Doganave në Këln. Pasi u zbulua droga, autoritetet gjermane e shkatërruan ngarkesën e paligjshme, ndërsa kontejneri u dërgua në destinacionin e planifikuar në Barcelona nën vëzhgim.
Ky operacion i kontrolluar çoi në arrestimin e dy personave në provincën spanjolle të Almerias më 14 maj. Njëri prej të dyshuarve është drejtues i një kompanie importi dhe, sipas hetuesve, është lidhur me një dërgesë të mëparshme të paligjshme.
Ministri gjerman i Financave, Lars Klingbeil, deklaroi se ky sekuestrim përbën një goditje të rëndë për rrjetet kriminale. Ai njoftoi gjithashtu se qeverisë do t'i paraqitet së shpejti një ligj i ri për drejtësinë financiare doganore, i cili ka për qëllim pajisjen e doganave me mjete më të avancuara teknike dhe ligjore për të përballuar trafikun e organizuar.