Një operacion i rëndësishëm kundër trafikut ndërkombëtar të drogës është finalizuar në portin e Vado Ligure, në veriperëndim të Italisë. Guardia di Finanza dhe autoritetet doganore kanë bllokuar 770 kilogramë kokainë me pastërti të lartë, e cila ishte fshehur brenda një kontejneri frigoriferik mes paletave me banane.
Sipas njoftimit zyrtar, ngarkesa kishte mbërritur nga një prej porteve kryesore të Ekuadorit. Autoritetet kanë vlerësuar se, nëse kjo sasi do të hidhej në tregun e paligjshëm, fitimet për organizatat kriminale do të arrinin në rreth 250 milionë euro.
Përsëritja e sekuestrimeve në port
Ky operacion shënon goditjen e dytë të madhe në këtë port brenda një kohe të shkurtër. Më pak se tre javë më parë, forcat e rendit kishin bllokuar në të njëjtin terminal 340 kilogramë kokainë, me një vlerë të përllogaritur prej 120 milionë eurosh.
Hetimet janë duke vijuar për të zbardhur rrjetin kriminal përgjegjës për transportin dhe për të identifikuar destinacionin përfundimtar të lëndës narkotike. Porti i Vado Ligure është vënë nën monitorim të shtuar, pasi po shndërrohet në një pikë kyçe tranziti për trafikimin e drogës nga Amerika e Jugut drejt Europës.
Përditësime
Në portin e Vado Ligure janë sekuestruar 770 kilogramë kokainë. Hetuesit gjetën 650 pako të fshehura në kontejner, disa prej të cilave mbanin stemën e flamurit të Serbisë, detaj që ka hapur pista të reja hetimore për autoritetet italiane.