Autoritetet italiane, përmes Guardia di Finanza, njoftuan një operacion të rëndësishëm kundër trafikut ndërkombëtar të lëndëve narkotike në portin e Vado Ligure, në veriperëndim të Italisë. Gjatë këtij kontrolli, u identifikuan dhe u sekuestruan mbi 770 kilogramë kokainë me pastërti të lartë.
Ngarkesa ishte fshehur mes dhjetëra paletave me banane brenda një kontejneri frigoriferik, i cili kishte mbërritur nga një port në Ekuador. Një element që tërhoqi vëmendjen e autoriteteve, i konfirmuar edhe nga pamjet filmike, është vendosja e flamurit të Serbisë mbi disa nga 650 pakot e drogës së sekuestruar.
Sipas vlerësimeve të policisë, vlera e kësaj sasie në tregun e paligjshëm llogaritet të jetë rreth 250 milionë euro. Ky aksion konsiderohet si një ndër më të mëdhenjtë të realizuar vitet e fundit në këtë nyje portuale, e cila shërben si një pikë kyçe për flukset tregtare në Evropë.
Aktualisht, Guardia di Finanza nuk ka dhënë detaje mbi destinacionin final të dërgesës, as nëse flamuri i gjetur tregon për një lidhje të drejtpërdrejtë me grupe kriminale në Serbi. Gjithashtu, autoritetet nuk kanë konfirmuar arrestimin e personave të përfshirë në këtë rast, ndërsa hetimet vijojnë për zbardhjen e plotë të ngjarjes.