Një operacion antidrogë i finalizuar nga Guardia di Finanza e Ankonës ka çuar në arrestimin e tre personave dhe sekuestrimin e një sasie të konsiderueshme lënde narkotike. Hetuesit ndoqën një automjet të dyshimtë nga Ankona deri në zonën periferike të Parmës, ku vëzhguan shkëmbimin e disa çantave mes makinës dhe një kamioni.
Pas kontrollit të ushtruar në kabinën e kamionit, u gjetën 100 pako me kokainë, me një peshë totale prej mbi 111 kilogramësh. Lënda narkotike ishte fshehur në një hapësirë të posaçme, ose fund të dyfishtë, të krijuar brenda kabinës. Përveç drogës, autoritetet sekuestruan edhe 19.000 euro në para të gatshme.
Sipas vlerësimeve të Guardia di Finanza, sasia e sekuestruar do të kishte gjeneruar fitime prej rreth 20 milionë eurosh pasi të përzihej dhe të hidhej në tregun italian. Të tre personat e arrestuar, dy prej të cilëve janë shtetas shqiptarë dhe një shtetas rumun, janë dërguar në burgun e Parmës me urdhër të Prokurorisë vendase. Hetimet për zbardhjen e rrjetit të trafikut dhe origjinën e ngarkesës vijojnë ende.