Kombëtarja e Gjermanisë është eliminuar nga Kupa e Botës pas disfatës me penallti ndaj Paraguait në fazën e 1/16-ave. Pasi koha e rregullt dhe ajo shtesë përfunduan me barazim, ku goli i gjermanëve u shënua nga Kai Havertz pas atij të Julio Encisos, skuadra amerikano-latine u tregua më e saktë në ekzekutimin e penalltive, duke fituar 4-3.
Kapiteni i Gjermanisë, Joshua Kimmich, pas ndeshjes deklaroi se ekipi nuk tregoi nivelin e duhur përballë asnjë prej kundërshtarëve gjatë turneut. Ai theksoi se eliminimi është pasojë e drejtpërdrejtë e performancave të dobëta.
“Ndihem tmerrësisht keq. Nuk luajtëm mirë ndaj asnjë kundërshtari. E merituam plotësisht eliminimin”, u shpreh Kimmich, duke e cilësuar këtë si ditën më të vështirë të karrierës së tij, pasi skuadra nuk arriti t’u dhuronte tifozëve asnjë arsye për krenari.
Statistikat tregojnë një rënie të performancës për Gjermaninë, e cila për herë të tretë radhazi nuk arrin të kalojë këtë fazë të turneut. Mbrojtja gjermane vazhdon të shfaqë probleme, duke pësuar gol në dhjetë ndeshje radhazi në Kupën e Botës. Kjo është seria më e gjatë pa mbajtur portën të paprekur në historinë e kombëtares, që nga finalja e vitit 2014 ndaj Argjentinës. Eliminimi ka nxitur debate të hapura në Gjermani lidhur me të ardhmen e stafit teknik dhe nevojën për ristrukturim.