Më datën 3 qershor, në Asamblenë e Përgjithshme të OKB-së, do të zhvillohet procesi i zgjedhjes së anëtarëve jo të përhershëm për Këshillin e Sigurimit. Ky organ mban përgjegjësinë kryesore për ruajtjen e paqes dhe sigurisë ndërkombëtare dhe përbëhet nga pesë anëtarë të përhershëm me të drejtë vetoje (Shtetet e Bashkuara, Rusia, Kina, Mbretëria e Bashkuar dhe Franca) si dhe dhjetë anëtarë jo të përhershëm, të cilët zgjidhen për mandate dyvjeçare.
Ministri i Jashtëm gjerman, Johann Wadephul, ka deklaruar se shanset e Gjermanisë janë të mira, duke theksuar angazhimin e vendit në sistemin e OKB-së. Autoritetet gjermane e bazojnë kandidaturën e tyre në rolin e shtetit si donatori i dytë më i madh në buxhetin e organizatës, pas Shteteve të Bashkuara, një status që e mbajnë për më shumë se pesë dekada.
Nga ana tjetër, ekspertët paralajmërojnë se rruga drejt zgjedhjes nuk është e garantuar. Johannes Varwick, profesor i marrëdhënieve ndërkombëtare në Universitetin e Halle-s, thekson se pozicionimi i Gjermanisë në konflikte aktuale, si ato në Ukrainë, Gaza dhe tensionet me Iranin, mund të krijojnë përçarje. Megjithatë, sipas Varwick, pesha financiare e Gjermanisë mbetet një faktor vendimtar në vendimmarrjen e shteteve anëtare.