Autoriteti Federal i Aviacionit Civil të Gjermanisë (Luftfahrt-Bundesamt) ka korrigjuar të dhënat zyrtare lidhur me Aeroportin Ndërkombëtar të Prishtinës “Adem Jashari”. Prej vitesh, ky institucion e kishte evidentuar gabimisht aeroportin si pjesë e territorit të Serbisë.
Lajmin e ka bërë të ditur ambasadori i Republikës së Kosovës në Gjermani, Faruk Ajeti, i cili theksoi se ky korrigjim erdhi si rezultat i angazhimit diplomatik dhe reagimit të vazhdueshëm qytetar. Sipas tij, ky rast dëshmon se bashkëpunimi ndërinstitucional dhe qytetar mund të prodhojë rezultate konkrete për mbrojtjen e fakteve që lidhen me shtetin e Kosovës.
Në një njoftim zyrtar, Ambasada e Kosovës në Gjermani ka inkurajuar qytetarët që të vazhdojnë të raportojnë çdo rast tjetër ku institucionet apo kompanitë gjermane nuk e paraqesin saktë Republikën e Kosovës apo qytetet e saj. Për çdo raportim, ambasada kërkon dëshmi përkatëse që mundësojnë verifikimin dhe ndërhyrjen e shpejtë diplomatike. Institucioni ka deklaruar se angazhimi për adresimin e këtyre pasaktësive do të mbetet prioritet edhe në të ardhmen.