Autoritetet dhe ekspertët e sigurisë në Kosovë kanë shtuar thirrjet drejtuar qytetarëve dhe mërgimtarëve që të shmangin kalimin nëpër territorin e Serbisë gjatë periudhës së pushimeve, duke e konsideruar këtë shtet si rrezik për shënjestrim të vazhdueshëm. Ky reagim vjen pas ndalimit të Osman Selmanit më 1 korrik në pikën kufitare të Mutivodës.
Eksperti i sigurisë, Drizan Shala, vlerëson se strukturat e sigurisë së Serbisë kanë përpiluar dosje për qytetarët e Kosovës që kanë qarkulluar më herët nëpër atë territor. Sipas tij, ata mund të jenë cak i mundshëm gjatë muajve korrik dhe gusht, kur numri i lëvizjeve të mërgimtarëve rritet në mënyrë të ndjeshme.
Nënkryetari i OVL-UÇK-së, Gazmend Syla, deklaroi se arrestimet e qytetarëve të Kosovës nga autoritetet serbe nuk janë ndalur që nga përfundimi i luftës. Ai theksoi se institucionet serbe vazhdojnë të mbajnë të njëjtën qasje, duke iu referuar faktit se për Osman Selmanin u caktua masa e paraburgimit, pavarësisht se nuk figuron të ketë qenë pjesë e UÇK-së.
Në lidhje me këtë situatë, Ministria e Punëve të Jashtme dhe Diasporës së Kosovës nuk ka kthyer përgjigje për të dhënë një qëndrim zyrtar.