Autoritetet serbe kanë arrestuar shtetasin e Kosovës, Osman Selmani (i lindur më 1953), në pikën kufitare të Mutivodës, teksa po kthehej nga fshati Tupallë i Medvegjës. Pas ndalimit, Selmani u dërgua në Prokurorinë për Krime Lufte në Beograd, ku Gjykata e Lartë i caktoi masën e paraburgimit prej 30 ditësh.
Sipas njoftimit të Ministrisë së Punëve të Brendshme të Serbisë, i dyshuari akuzohet se më 14 qershor 1999, në lagjen Sofalia të Prishtinës, në bashkëpunim me pjesëtarë të Ushtrisë Çlirimtare të Kosovës (UÇK), ka vrarë çiftin civil të nacionalitetit serb, Vladimir dhe Persa Stanisavljeviq. Në njoftimin e autoriteteve serbe nuk specifikohet nëse Selmani ka qenë pjesëtar i UÇK-së.
Familjarët e Osman Selmanit kanë konfirmuar arrestimin dhe kanë bërë të ditur se ai jeton në Prishtinë prej më shumë se 50 vitesh. Përmes një reagimi publik, ata i kanë hedhur poshtë akuzat, duke i vlerësuar ato si të pabazuara dhe të pavërteta. Familja ka shprehur besimin në pafajësinë e të arrestuarit dhe thekson vendosmërinë për të ndjekur procedurat deri në zbardhjen e së vërtetës.
Ky rast shënon një tjetër episod të arrestimeve të shtetasve të Kosovës nga ana e Serbisë gjatë viteve të fundit, nën pretendimet për krime lufte gjatë periudhës 1998-1999. Ministria e Punëve të Jashtme dhe Diasporës e Kosovës është vënë në dijeni për rastin dhe është në pritje të detajeve shtesë.
Përditësime
Avokati Arianit Koci mori përsipër mbrojtjen e 74-vjeçarit Osman Selmani, duke mohuar akuzat për krime lufte. I biri i të arrestuarit, Arben Selmani, deklaroi se familja ndodhej në Maqedoni gjatë periudhës 25 maj – 25 qershor 1999. Organizata e Veteranëve të Luftës së UÇK-së konfirmoi se Osman Selmani nuk figuron në regjistrat e tyre si veteran. Familjarët raportuan se autoritetet e dërguan fillimisht të arrestuarin në Leskovc përpara transferimit në Beograd, pa njoftuar zyrtarisht familjen për vendndodhjen e tij.