Shtetasi i Kosovës, Osman Selmani, është arrestuar nga autoritetet serbe më 1 korrik, teksa po kthehej nga vendlindja nëpërmjet pikës kufitare të Mutivodës. Ai ndodhet në paraburgim në Beograd, ku përballet me akuza për krime lufte, të cilat familjarët dhe mbështetësit e tij i konsiderojnë të pabazuara.
Në përpjekje për të vërtetuar pafajësinë e tij, ndërmarrësi Nebi Hoxha ka publikuar një apel në rrjetet sociale. Sipas Hoxhës, në periudhën kur pretendohet se janë kryer krimet, gjegjësisht nga prilli deri në qershor 1999, Osman Selmani ka qenë i strehuar në Kampin e Refugjatëve në Çegran të Gostivarit.
Apeli synon të mbledhë dëshmi nga aktivistët, punonjësit humanitarë dhe organizatat që operuan në atë periudhë në kamp. Organizatat e përmendura në thirrje përfshijnë:
- UNHCR
- Kryqi i Kuq i Maqedonisë (Crven Krst na RM)
- NATO, OSBE, IOM, UNICEF
- Médecins Sans Frontières (MSF)
- Caritas, Mercy Corps, CARE dhe OXFAM
Familjarët e Selmanit kanë njoftuar se po ndërmarrin të gjitha hapat ligjorë të nevojshëm për mbrojtjen e tij. Kërkohet nga çdo person që disponon lista regjistrimi, dokumente apo fotografi të kampit të periudhës përkatëse, që të ofrojë informacionet e nevojshme për të ndihmuar në procesin gjyqësor që pritet të zhvillohet në Beograd.