Berat Gjimshiti pritet të largohet nga Atalantën në fund të këtij sezoni, pasi klubi bergamask nuk i ka ofruar kontratë të re. Kapiteni i kombëtares shqiptare ka kontratë ende për rreth dy muaj e dhjetë ditë dhe emri i tij ka hyrë në radarin e disa klubeve italiane.
Sipas mediave italiane, Fiorentina është skuadra e parë që ka bërë hapa konkretë për ta siguruar shërbimin e 33-vjeçarit. Drejtori sportiv i Fiorentinës, Fabio Paratici, e konsideron Gjimshitin profil ideal për të forcuar repartin defensiv, falë fleksibilitetit të tij në skemat me tre ose katër mbrojtës. Në Firence, ai shihet si lider potencial për prapavijën në sezonin e ardhshëm dhe jo thjesht si rast i mirë në tregun e transferimeve verore.
Gjimshiti ka qenë pikë referimi në mbrojtjen e Atalantës për dhjetë vjet, duke u shndërruar në element kyç të repartit defensiv. Megjithatë, mungesa e ofertës për rinovim ka hapur dyert për largim. Në të kaluarën, ai ka refuzuar propozime të majme financiare nga Lindja e Mesme për të vazhduar karrierën në Serie A.
Për Gjimshitin kanë shfaqur interes edhe klube të tjera. Milani ka pyetur më herët për të, ndërsa Igli Tare, drejtor i Lazios, nuk përjashton mundësinë e afrimit të bashkëkombësit. Javët në vijim do të jenë përcaktuese për të ardhmen e tij, me mundësi për oferta nga kampionate arabe, por qëndrimi në Itali mbetet prioritet.
Përditësime
Juventusi tregon interes për Berat Djimsitin. Mbrojtësi ka zhvilluar 42 paraqitje këtë sezon me Atalantën.