Kapiteni i Kombëtares shqiptare, Berat Gjimshiti, është në listën e emrave që Juventusi po studion për të përforcuar repartin e mbrojtjes në sezonin e ardhshëm. Mbrojtësi 33-vjeçar, i cili luan te Atalanta, pritet të bëhet lojtar i lirë në qershor, pasi nuk ka rinovuar ende kontratën me klubin nga Bergamo.
Drejtuesit e Juventusit e vlerësojnë Gjimshitin për eksperiencën, lidershipin dhe fleksibilitetin taktik. Ai mund të luajë si në skemën me tre mbrojtës, ashtu edhe me katër. Megjithatë, mosha e tij paraqet një element që mund të ndikojë në vendimmarrje. Sipas mediave italiane si CalcioMercato, trajneri Spalletti e pëlqen për aftësinë në qarkullimin e topit.
Atalanta synon ta mbajë në organikë një prej liderëve të skuadrës, si në fushë, ashtu edhe në dhomat e zhveshjes, por deri tani nuk ka sinjale konkrete për rinovimin e kontratës.
Interesi për Gjimshitin nuk kufizohet te Juventusi. Roma dhe Milani kanë shfaqur po ashtu interes, duke hapur garë për shërbimet e tij gjatë merkatos së verës.
Në sezonin aktual, Gjimshiti ka zhvilluar 32 ndeshje në të gjitha kompeticionet me Atalantën dhe ka shënuar një gol në Kupën e Italisë, duke konfirmuar rolin e tij të rëndësishëm në prapavijë.