Gazmend Peposhi dhe Kalosh Peposhi, dy kushërinj nga Kukësi, u shpallën fajtorë nga Gjykata e Posaçme Gjenerale e Apelit (GJKKO) për veprën penale të korrupsionit aktiv në zgjedhje, të kryer në bashkëpunim. Prokuroria e Posaçme kundër Korrupsionit dhe Krimit të Organizuar (SPAK) i kishte çuar ata për gjykim.
Vendimi u mor më 18 shkurt 2026 nga trupa gjykuese e përbërë nga gjyqtarët Flojëra Davidhi, Bib Ndreca dhe Flora Hajredinaj.
Për Kalosh Peposhin, gjykata caktoi dënimin fillestar me 1 vit, 7 muaj e 15 ditë burgim. Pas uljes me një të tretën për gjykimin e shkurtuar, masa u reduktua në 1 vit e 1 muaj burgim. Duke qenë se koha e qëndrimit në paraburgim rezultoi më e gjatë se masa e dënimit, ai u lirua menjëherë, nëse nuk mbahet për ndonjë shkak tjetër, dhe u hoq masa e arrestit në burg.
Ndërsa për Gazmend Peposhin, dënimi fillestar ishte 1 vit e 9 muaj burgim, i cili pas uljes me një të tretën u bë 1 vit e 2 muaj burgim. Ai do ta vuajë dënimin në një burg të sigurisë së zakonshme, duke filluar nga dita e ekzekutimit të vendimit.