Gjykata e Posaçme kundër Korrupsionit dhe Krimit të Organizuar (GJKKO) ka vendosur më 19 mars 2026 kalimin për gjykim të dosjes penale lidhur me vrasjen e Fatbardh Licit, ngjarje e ndodhur më 10 gusht 2018 në lagjen Kiras të Shkodrës. 53-vjeçari u ekzekutua me breshëri plumbash teksa ndodhej në një lokal me qira të vëllait të tij, Sokol Lici.
Të pandehur janë Safet Bajri (ndryshe Rustemi), Behar Bajri (ndryshe Brajoviq ose Rustemi), Astmer Bilali dhe Eria Ago, ish-partnere e Safet Bajrit. Sipas SPAK, Safet Bajri, Behar Bajri dhe Astmer Bilali akuzohen për "vrasje me paramendim" të kryer në formën e grupit të strukturuar kriminal, "grupi i strukturuar kriminal", "kryerja e veprave penale nga organizata kriminale dhe grupi i strukturuar kriminal" si dhe "mbajtje pa leje të armëve luftarake". Eria Ago akuzohet për "përkrahje të autorit të krimit" dhe drejtimin e një makine të përdorur në ngjarje.
Sipas hetimeve të SPAK, ngjarja lidhet me konfliktin mes fiseve Bajri dhe Lici për kontrollin e territorit në Shkodër. Motivi dyshohet se është hakmarrje, pasi Behar Bajri e fajëson Ibrahim Licin, nip të Fatbardh Licit, për vrasjen e ish-policit Boran Bërçanës dhe bashkëshortes së tij Silvi Ndoci më 15 korrik 2018 në Shkodër, ku shpëtoi një fëmijë 3-vjeçar. Safet Bajri dhe Astmer Bilali u afruan me një automjet tip Mercedes ose Benz të vjedhur, ndërsa ky i fundit qëlloi viktimën. Mjeti u djeg në zonën e Dobraçit. Pas krimit, Safet Bajri qëndroi në Shkodër, ndërsa Bilali u largua drejt Tiranës me Eria Agon.
Avokatët e të pandehurve kërkuan në seancë pushimin e çështjes ose kthimin e aktit për plotësim hetimesh, duke përmendur pezullimin e mëparshëm nga prokuroritë e tjera për mungesë provash. Safet Bajri u arrestua më 21 shkurt 2025 me urdhër të SPAK, ndërsa GJKKO miratoi analizën e ADN-së së tij, e cila nuk u krye menjëherë për shkak të refuzimit inicial të të arrestuarit. Hetimet u mbështetën te të dhënat nga SKY ECC.