Avokati i Safet Bajrit paraqiti sot në ambientet e SPAK-ut për të tërhequr dosjen hetimore, e cila për shkak të volumit të madh u transportua me karrocë. Në video të publikuara nga mediat shihet avokati duke vendosur kutitë me fashikujt në karrocë.
SPAK ka ngritur akuzat kundër Safet Bajrit, Behar Bajrit, Astmer Bilalit dhe Eria Ago për vrasjen e Fatbardh Licit, xhaxhai i Ibrahim Lici, në gusht të vitit 2018. Hetimet u mbyllën dhe çështja u dërgua për gjykim në nëntor të vitit 2025.
Akuzat përfshijnë:
- Vrasje me paramendim, kryer në formën e bashkëpunimit të grupit të strukturuar kriminal;
- Grupi i strukturuar kriminal;
- Kryerja e veprave penale nga organizata kriminale dhe grupi i strukturuar kriminal ndaj Safet Bajrit, Behar Bajrit dhe Astmer Bilalit.
Eria Ago akuzohet se ka drejtuar një nga makinat e përdorura gjatë ngjarjes.
Sipas Prokurorisë së Posaçme, motivi lidhet me dyshimet e Behar Bajrit se Ibrahim Lici kishte ekzekutuar ish-policin Boran Bërçana, anëtar të grupit të tyre, më 15 korrik 2018. Në atë rast, Boran Bërçana u vra bashkë me partneren Silvi Ndoci në makinë, ndërsa fëmija i tyre 3-vjeçar shpëtoi.
Përditësime
SPAK konfirmoi konflikte të hershme mes të pandehurve dhe familjes Lici, të lidhura me kontrollin e territorit dhe ngjarje kriminale të 2018-ës përveç vrasjes së Licit.