Ish-drejtoresha e AKSHI-t, Mirlinda Karçanaj, u paraqit paraditen e kësaj të marte në ambientet e Prokurorisë së Posaçme (SPAK). Paraqitja e saj është bërë në zbatim të masës së sigurisë detyrim paraqitje, pasi Gjykata e Lartë vendosi lehtësimin e masës nga arrest shtëpie në të cilën ajo ndodhej më parë.
Karçanaj është një ndër 8 të pandehurit në kuadër të dosjes që heton abuzimet me tenderat e AKSHI-t. Sipas akuzave të SPAK, personat e përfshirë dyshohet se kanë manipuluar procedurat e prokurimit, duke favorizuar kompani të caktuara dhe duke ushtruar presion e dhunë ndaj operatorëve të tjerë ekonomikë. Ndër veprat penale për të cilat po zhvillohen hetimet janë grup i strukturuar kriminal, shkelje e barazisë në tendera, pastrim parash dhe heqje e paligjshme e lirisë.
Në lidhje me këtë çështje, Gjykata e Posaçme kundër Korrupsionit dhe Krimit të Organizuar (GJKKO) ka miratuar sekuestrimin e pasurive me vlerë mbi 40 milionë euro. Pasuritë e sekuestruara përfshijnë apartamente, toka në Tiranë, Durrës, Vlorë e Kavajë, vila, prona në zonën e Petrelës, automjete luksoze, një jaht, si dhe llogari bankare. Pjesë e hetimeve janë gjithashtu biznesmenët Ergys Agasi dhe Ermal Beqiri, të cilët aktualisht janë shpallur në kërkim, si dhe të hetuar të tjerë si Hava Delibashi, Andis Papa, G.H, Rogers Rryta dhe zëvendësdrejtori i Policisë së Tiranës, Erion Ismaili, ndaj të cilit është vendosur masa e pezullimit nga detyra.