GJKKO liron Greta Gjocin, shtyhet ekzekutimi i dënimit

Gjykata e Posaçme e Shkallës së Parë ka ekzekutuar vendimin për lirimin e Greta Gjocit (Pepa) nga institucioni i vuajtjes së dënimit në Pojskë. Për shkak të pranisë së foshnjës së saj, e cila është 3 deri në 4 muajshe, transportimi i 33-vjeçares nga burgu drejt GJKKO-së është realizuar me autoambulancë. Gjatë seancës, Gjoci pretendoi se gjatë dy ditëve të qëndrimit në qeli, foshnja kishte shfaqur probleme shqetësuese me ushqyerjen dhe gjumin. Pas shqyrtimit të kërkesës, trupi gjykues i kryesuar nga gjyqtarja Etleva Deda vendosi pezullimin e ekzekutimit të dënimit deri më 2 qershor 2027, datë kur fëmija mbush moshën një vjeç, duke i mundësuar të dënuarës kujdesin e domosdoshëm amësor.

Greta Gjoci, e cila është dënuar fillimisht me 6 vite e 8 muaj burgim për veprat penale “mashtrim kompjuterik” dhe “pjesëmarrje në grup të strukturuar kriminal” në kuadër të çështjes së grupit të Bruno Çobos, ka ende 3 vite e 5 muaj burgim për të kryer. Vendimi për dënimin e saj ishte lënë në fuqi nga Gjykata e Posaçme e Apelit më 5 tetor. Në seancën gjyqësore, prokurori Ened Nakuçi u shpreh dakord me kërkesën e mbrojtjes për pezullim, duke argumentuar nevojën për kujdesin ndaj fëmijës në përputhje me Kodin e Procedurës Penale.

Avokati Jurgen Gjoci pranoi përfaqësimin e klientes për arsye humanitare dhe lidhje familjare, duke thyer bojkotin e avokatëve. Ndërkohë, Mekanizmi për Parandalimin e Torturës pranë Avokatit të Popullit kishte kryer më herët verifikime në institucionin e Pojskës për rrethanat e rastit. Çështja e Gjocit është pjesë e një sërë kërkesash të ngjashme, pasi disa prej grave të tjera të dënuara në këtë grup u janë drejtuar instancave gjyqësore për shtyrje të ekzekutimit të dënimit për motive familjare.