Gjykata e Posaçme e Shkallës së Parë për Korrupsionin dhe Krimin e Organizuar (GJKKO) ka rrëzuar më 5 maj 2026, me vendimin nr. 258, kërkesën e ish-kryebashkiakut të Himarës Jorgo Goro për pezullim të ekzekutimit të vendimit penal nr. 53, datë 30 korrik 2025. Kërkesa u paraqit më 31 mars 2026 dhe u shqyrtua nga gjyqtarja Etleva Deda.
Trupi gjykues, bazuar në nenin 476 të Kodit të Procedurës Penale, vendosi rrëzimin e kërkesës si të pambështetur në prova dhe ligj. Gjykata urdhëroi ngarkimin e shpenzimeve gjyqësore te Goro dhe njoftoi për të drejtën e ankimimit në Gjykatën e Posaçme të Apelit për Korrupsionin dhe Krimin e Organizuar brenda afatit ligjor.
Goro u dënua me 2 vite burg për shpërdorim detyre të kryer në bashkëpunim dhe në më shumë se një rast, sipas neneve 248 dhe 25 të Kodit Penal. Për shkak të gjykimit të shpejtuar, dënimi u reduktua në 1 vit e 4 muaj heqje lirie, shoqëruar me 5 vite ndalim për ushtrimin e funksioneve publike dhe sekuestro të një apartamenti. Apeli i Posaçëm e la në fuqi vendimin e GJKKO-së së parë.
SPAK llogariti se, pas zbritjes së kohës së paraburgimit, Goro-s i mbeten 6 muaj e 10 ditë për të shlyer. Akuzat lidhen me tjetërsimin e 4263 metra katë tokë, të dhuruara pasuesit Arqile Bollano në vitin 2016, pas kallëzimit të Fredi Belerit. Goro u arrestua më 23 mars 2024 dhe u lirua më 29 gusht 2025 nga një dënim i mëparshëm për shpërdorim detyre dhe fshehje pasurie. Pas vendimit të apelit, ai u vetëdorëzua në Komisariatin e Vlorës.