Gjykata e Lartë nuk pranoi rekursin e ish-kryebashkiakut të Himarës Jorgo Goro dhe të pandehurve të tjerë kundër vendimit të fajësisë. Kjo gjykatë la në fuqi dënimin, por vendosi prishjen e vendimit në lidhje me konfiskimin e pasurisë, e cila do të rishqyrtohet.
Çështja lidhet me tjetërsimin e një prone në zonën e Livadhës. Gjykata e Posaçme e Shkallës së Parë e shpalli Goro-n fajtor më 30 korrik 2025. Apeli i Posaçëm i GJKKO-së konfirmoi dënimin fillestar prej 2 vitesh burg, i reduktuar në 1 vit e 4 muaj për shkak të gjykimit të shkurtuar.
Më 31 mars 2026, SPAK-u kërkoi rikthimin e Goro-s në burg, pasi, sipas llogaritjeve duke përfshirë kohën në paraburgim, i mbetnin 6 muaj e 10 ditë për t'i vuajtur. Ai u arrestua fillimisht më 23 mars 2024 dhe u lirua në gusht 2025.
Më herët, Goro kishte vuajtur 17 muaj burg nga një dënim tjetër prej 2 vitesh e 20 ditësh, për tjetërsimin e rreth 10 mijë metrave katrorë tokë në zonën e Gjilekës, në Himarë. Edhe aty përfitoi ulje dënimi për shkak të procedurës së gjykimit të shkurtuar.
Përditësime
Gjykata e Lartë dërgoi çështjen e konfiskimit për rigjykim në Shkallën e Parë të GJKKO-së, me trupë gjykuese tjetër.
Akuzat e tjera kundër Jorgo Goro-s:
- Dy raste të shpërdorimit të detyrës në bashkëpunim;
- Refuzimi për deklarimin, mosdeklarimi, fshehja ose deklarimi i rremë i pasurive dhe interesave private.