Kryebashkiaku i Tiranës, Erion Veliaj, i cili ndodhet në paraburgim, ka ndërmarrë ndryshime të reja në strukturën drejtuese të Bashkisë së Tiranës. Pas largimit të Anuela Ristanit, Veliaj ka shkarkuar nga detyra nënkryetarin Blendi Sulaj. Në reagimin e tij, Sulaj ka falënderuar stafin e bashkisë dhe ka shprehur përkushtimin për t'u angazhuar në fushatën elektorale të Partisë Socialiste në mbështetje të kandidates Ogerta Manastirliu për zgjedhjet vendore të vitit 2027.
Në rrafshin gjyqësor, Gjykata e Posaçme e Apelit ka rrëzuar kërkesën e Erion Veliajt për shfuqizimin e vendimit që pezulloi afatet e paraburgimit të tij. Sipas burimeve, pezullimi i këtyre afateve u aplikua në seancat e datave 25 maj dhe 10 qershor, për shkak të mungesës së avokatëve të të bashkëpandehurve të tjerë, mes të cilëve edhe avokati Maksim Haxhia.
Avokati i Veliajt, Plarent Ndreca, e ka kundërshtuar këtë vendim, duke e cilësuar atë si të padrejtë pasi argumenton se shtyrjet nuk kanë qenë për shkak të klientit të tij. Mbrojtja ka paralajmëruar se do ta dërgojë çështjen në Gjykatën e Lartë. Erion Veliaj ndodhet në paraburgim që nga data 10 shkurt 2025 dhe përballet me akuza për korrupsion dhe pastrim parash.