Seanca e parë në themel ndaj kryebashkiakut Erion Veliaj dhe të bashkëpandehurve të tjerë në GJKKO nuk u zhvillua për shkak të mungesës së mbrojtësve ligjorë Maks Haxhia, Dritan Jahaj, Aranit Rroshi dhe Artit Cami. Prokurori i posaçëm Ols Dado kërkoi shtyrjen e seancës, kërkesë e cila u pranua nga trupi gjykues i kryesuar nga gjyqtarja Elsa Ulliri.
Kryebashkiaku Veliaj nuk mori pjesë në seancë, duke e argumentuar mungesën përmes një shkrese zyrtare ku deklaronte se mbajtja në "kafazin e xhamit" gjatë gjykimit është e padinjitshme. Ai u përfaqësua në sallë nga avokati Plarent Ndreca. Gjatë diskutimeve procedurale, avokati Ndreca pretendoi se mbrojtjes nuk i janë vënë në dispozicion 24 fashikuj të dosjes hetimore. Trupi gjykues sqaroi se materialet në fjalë lidhen me njoftimin e akuzave për të pandehurit e tjerë dhe nuk cenojnë të drejtën e mbrojtjes së Veliajt. Megjithatë, gjykata vendosi që dokumentacioni t'i vihet në dispozicion palës mbrojtëse përpara seancës së ardhshme.
Në lidhje me vijimin e procesit, gjykata urdhëroi pezullimin e afateve të paraburgimit për Erion Veliajn. Gjithashtu, trupi gjykues vendosi që seanca të mos vijojë me praninë e kamerave, duke lejuar filmimin vetëm gjatë momenteve të para të procesit. Në këtë çështje gjyqësore janë të përfshirë në total 19 persona, ndërsa për 11 prej tyre është pranuar kërkesa për gjykim të shkurtuar dhe çështja e tyre është veçuar.